الجمعة، 28 نوفمبر 2008

سمكمك


النهارده حر اوى ياحمص...واحنا كمان الضهر..والنبى خلينا بكره
ههههههههههههههههه..حسيت ان الموضوع مابقاش هوايه او تسليه بقى عندى شعور اننا رايحين الشغل..مش عارفه ليه عندى شعور ان حمص برضه زيى ..رايح يصطاد بس علشان السنارتين اللى اشتراهم ..يعنى مش علشان يصطاد..رايح غصب ههههههه..بس طبعا ماصارحناش بعض..لكن شكلنا قرفان وزهقان وكاننا رايحين نصطاد علشان علينا فلوس ومضطرين ....حمص اختار اوحش مكان ممكن نصطاد فيه...شكله بيعقدنى
هنا وحش ياحمص ...فيه قطه كمان غلسه حتاكل السمك اللى حنجيبه
لقيته بيقولى: مش لما نجيب سمك..
متشائم دايما
وبعدين نبقى نديلها اول سمكه تطلع
احيانا احيانا متفائل ..
طلع سنارته اللى شبكت فى بنطلون الراجل اللى معدى ولما حاول يفكها وبيلف دخلت فى عين الست اللى جمبنا
وفى الاخر جهزها بالخيط ...اما سنارتى... بتحايل على طرفها يطلع علشان اثبت فيه الخيط...بخبط فيها اتنطرت طارت على الراجل بتاع الترمس اللى جمبنا...
عندى شعور اننا بنصور فيلم كوميدى
سنارتى ياحمص الحقنى
حنتاخر على السمك كده..عايزين نلحق نصطاد
اخيرا حنصطاد ونستمتع
حمص
نعم
ماجبناش حاجه نحط فيها السمك اللى حيطلع
.......
حمص
نعم
عطشانه
حمص
نعاااام
القطه مزهقانى
حمص
نعااااااااااااااااااام
الدنيا حر
حمص
نعااااااااااااااااااااااااااااااام
حط لى الطعم
حمص

.......

عايزه اروح
قعدنا كتير ...............بتاع ربع ساعه
حلاوه...كفايه كده...تعبنا النهارده
اه فعلا ...طب حنتغدى ايه
سمك طبعا.....من السوق

واقول ايه للراجل بتاع السمك اللى اشتريت منه جمبرى طعم للصيد ..لا ياسيدى اتكسف....حيعرف اننا ماعرفناش نصطاد

وروحنا للراجل بتاع السمك...

عايزين اتنين كيلو سمك...علشان نعرف السمك بتاعك احلى واللا بتاعنا اللى اصطدناه...

حماس


طبعا مش حماس غزه...اه وربنا مش عايزين وجع قلب وكلابوش

اتفقت انا وحمص اننا نصطاد...اه بجد..فكره وكبرت فى دماغنا زى كل الافكار اللى بتطلع فجأه ..حنصطاد ياعباس يعنى حنصطاد..وبمنتهى الحماس اللى بيجيلنا على فترات رحنا واشترينا سنانير..ياحمص ماحنا عندنا اتنين قدام...لكن حمص فكرنى انهم كانو نحس وماجبناش بيهم ولا سمكه..لا ..جبنا واحده عندها عيب خلقى ...دى السمكه اليتيمه الوحيده اللى جت فى سنارته من سنه واتعقد بعدها من السمك والبحر..المهم زى ماحمص معودنى دايما فى نوبات الحماس ..روحنا اشترينا اغلى واشيك واجمل سنارتيين..ياحمص امسك ايدك..نجيب حاجه كده على قد النوشه اللى حتاخد يومين كالعاده وتروح لحال سبيلها...ابداااااااا

وجيبنا السنارتين واترموا فى شنطة العربيه

وكل يوم ...عايزين نصطاد ياحمص

اه والله ياحلاوه

نصطاد ...النهارده
تعبانين

طب بكره
مشغولين

طب ايه رايك فى بعده
مضايقين

لغاية ماقررنا امبارح نروح نصطاد

ياالا ياريس....

جبتى طعم ياحلاوه

لا

طب ياللا نشترى
..وطلعنا بالعربيه وبالطعم وبال.....سنارتين.....يامهون

جتنا ستين خيبه






(المقاطعه الامريكيه للعرب)...
اتصدمت لما قريت العنوان ده فى مدونة ابن ناصر Ibn Nasser 
ولقيت معاها الصور والفيديو ده كمان...
قال اييييييييه....ولاد ال...............عاملين حملة لمقاطعه العرب الارهابيين الوحشين الفاشيين المتخلفين الجزم اللى هما احنا.....
والمصيبه ....
اننا على الجانب الاخر بنمسح لهم جوخ وبننافقهم ماشيين فى ديلهم 
جتنا ستين خيبه على خيبتنا....
الحقييييييييييينى بدوا الضغط يا حلاااااااااااااااااااااااااااااوه

انا بقى حطول عليكم..بموت فى التفاصيل..وبحب احكيها لحمص زى ماأنزلت..مابضيعش فتفوتة احداث تحصل ومايكونش فيها معايا

اه ..نسيت انا حلاوه..نص حمص الحلو..ورفيقة السلاح والدرب والعيشه..جايه فى الكلام اهو...باختصار علشان بغلى لبن ومش فاضيه..اتعرفنا انا وحمص على بعض فى اول مابتدينا حياتنا العمليه...طبيبيين فى مستشفى واحده بس قسمين مختلفين وكانت بداية التعارف.......خناقه خفيفه كده علشان مريض اتأخرنا فى تدوين نتيجة تحاليله والبيه حمص كان مستعجل علشان المريض داخل عمليات وطبعا حمص هو الجراح

حمص يتميز بانه مابينفعلش بسهوله ..وبيطول باله على اللى قصاده بعكسى..حمقيه وسريعة الطلقات...يوووووه..كانت ايام

المهم...مش عاوزه حد يفهم انى وحمص مثلا مابنزعلش مع بعض او اننا بنعيش بشكل رومانسى على طول...لكن الحقيقه بنزعل بس برضه برومانسيه..علشان اتفقنا من اول ماتجوزنا اننا مانبقاش بايخيين ونتخانق زى الناس المتجوزه الرزله هههههههه..يعنى خناق بس بشياكه...زى مابيقولوا ملح وفلفل الحياه...مانكرش ان ساعات كيس الملح بيدلق كله...بس برضه الحياه مع حمص...ألذ...ألذ...ألذ

اللبن فااااااااااااااااااااااار...

أنا حمص حمص يا حلااااااوه........


مش هطول عليكم فى اول بوست اللى هيكون للتعارف 
باختصار ....أنا (حمص)
مواطن مصرى فى منتصف العمر
انتمى للطبقه المتوسطه المشرفه على الانقراض
واكيد ...اكيد احلامى اكبر من امكانياتى ....ولكن...
ايوووووه.....ولااااااااااااااكن
حلاوة دايما تقولى ....
بتقولوا مين حلاوة....
اقولكم...
حلاوة دى زوججتى وحبوبتى وصاحبوبتى
وانا وهيا بنشكل ثنائى نادر باعتراف جميع اصدقائنا
واتفقنا اننا ننضم لعالم التدوين والمدونين
لكتابة يومياتنا وأطرف المواقف اللى قابلتنا وبتقابلنا
مرحباً بكم فى عالمنا الصغير اللانهائى
عالم ...
حمص...وحلاوه....