الدور الدور موعوده ياللى عليكى الدور

ياللا
....

مااهو التور لما بيقع بتكتر سكاك

ماهو اللى مالوش ضهر بيضرب على بطنه..فمابالنا بقى باللى مالوش بطن ولاضهر ولامنظر خالص..ده بقى مابيضربش....ده بيتجلد..

ياللا...مايجيش منه..ومانجلكوش فى حاجه وحش..ولاعزاء للغلابه المقهورين وكل واحد ينام على عيشه ويمشى جمب الحيط...ويشد اللحاف وينام...

الحكايه...ببساطه..اننا بقينا هفيه...مش حتكلم عن الفراعنه ولا المسلات والهرم والكلام المحنط ده علشان انا بطنى بتوجعنى من الكلام ده...انا حتكلم عن دكتور مجدى يعقوب ودكتورياسين عبد الغفار ودكتوراحمد شفيق والمشد والباز وكتير كتير من الاسماء المحترمه اللى شرفتنا فى الطب وكل المجالات .ومعلش مش تحيز ولا يحزنون لكن بتكلم عن حقايق الدنيا عرفاها..ايام ماكنا محترمين

النهارده الدكاتره بيتجلدوا فى السعوديه اسمعى واتفرجى يامصر..ولادك بيتجلدوا.. وماحدش مسؤل كلف نفسه يقول فيه ايه ومالهم دول عملوا ايه .لكنهم.للاسف بيتفرجوا على اهانة اطباء مصريين ..ايه اللى فتح السيره؟ اقولكم ايه اللى فتح السيره.

..اللى فتحها الخبر اللى سمعته النهارده بتاع الطبيب السعودى والطبيب المغربى اللى الدنيا قامت وماقعدتش علشان حتة القسطره اللى عملوها لبنت مغربيه عندها ثقب فى القلب....وكانهم فتحوا عكا او جابو سر القنبله النوويه..معهد القلب عندنا وقسم جراحة القلب بكلية طب عين شمس ياما عملوا عمليات اصعب من كده ..وكفاءه زى الدكتور حمدى السيد استاذ الكام دكتور اللى شفناهم على شاشة التليفزيون النهارده وهما حاسيين بالفخر وبانهم جابوا الديب من ديله وهما كانوا لسه ماتولدوش لما دكاترة مصر كانوا بيعملوا عجايب فى مجالات الطب المختلفه يعنى قدام عملاق زى دكتور حمدى السيد يبقوا ولاد امبارح بالليل .لكنهم ناس اجتهدت وحكومتها كرمتها واحترمتها وحافظت عليهم وصانتهم وبتحميهم ....الله يرحمك يامصر ويبشبش الطوبه اللى تحت راسك...سبقنا العالم اللى بتجلدنا النهارده وكانوا بيموتوا من الفرحه من وقت قريب اوى لما بيشوفوا دكتور مصرى فى بلدهم..وبيتنشقوا على العماله المصريه ..النهارده بيتريقوا علينا فى طاش ماطاشهم السخيف وبنتجلد فى السر ومن غير ماحد يقول ليه...النهارده بقينا ببلاش..حبه مننا بيتهانوا فى بلاد الخليج (اللى بمنتهى الصراحه ) قالوا انهم مستغنيين عن الدكتور المصرى وحنجيب سيد سيده بفلوسنا قصدى بفلوسهم.و حبه مننا بيموتوا غرقانين فى العباره وحبه تحت القطر وحبه فى طابور العيش. وحبه من ضرب المدرسين فى المدرسه وحبه بايد مجرمين ومتشردين وحبه بايد مجانين زى مالحكومه بتقول...الحكومه شايفانا كتير...مرطرطين...حاجه بلاش كيده..مع ان الثروه البشريه نعمه..لكننا فى مصر سبب نقمتها وفقرها وبلاءها هما بيقولوا كده..اننا كتير...ومن حوالى 25 سنه كانت الناس بتقف فى طابور الجمعيه علشان يجيبوا فراخ النهارده والنهارده بعد معاهدة السلام وبعد 25 سنه خدمه للبلد الناس برضه لسه بتقف طابور..بس المره دى مش علشان الفراخ..طب ياريت الناس تقف دلوقتى على طابور فراخ..لكن بقوا بيقفوا علشان رغيف عيش..اللهم صلى على النبى...

فلما تبقى كل مشكلتنا نجيب ازاى رغيفين عيش يبقى حنفضى امتى ندخل سباق التطور والعلم والتكنولوجيا .؟؟؟؟.

لا ولسه....داخلين كمان على المهندسين وحكاية المهندس المصرى اللى قبضوا عليه فى السعوديه..ياترى بكره حيبقى مين اللى عليه الدور

كل الناس خيبتها السبت والحد...واحنا خيبتنا بقت....عرض مستمر..طوال الاسبوع

استرها ياللى بتستر

ههههههههههههههه ...يالهوى..حمصيه مين....وسمسميه مين ..ياحمص حرام عليك فواقتنى ...هما اجمل حاجه فعلا مابنكرش بس يعنى ده مش معناه تقول كده الاسامى فى وشى..خضتنى يااخى...وانا لسه قعده برجع لورا وبرجع شريط حياتنا لورا ولسه يادوب بسمع الزفه وانا لابسه الطرحه والفستان الابيض وانت جمبى منور حياتى وبنقطع التورته .. تقوم تقولى حمصيه وسمسميه ...هههههههههه

خلاص نقدم بقى حمصيه وسمسميه

سمسميه بنتنا الكبيره...بيقولى فى الشكل شبهى.اخر لماضه ..سكر

..وحمصيه الصغيره...بيقولوا فى الشكل شبهك...تقيله اوى وعلى جوه..ههههههه...سوهونه يعنى بس عسوله وربنا

كل القرايب والعيله كانت بتحلم تشوف ولادنا علشان كانوا بيقولوا دايما اننا خليط عجيب.. متجانس ومذهل..الكل كان متلهف على رؤية ولاد حمص وحلاوه..وانا اشهد

انهم من الطف واجمل واذكى واخف دم بنتين شفتهم فى حياتى..من الاخر...ههههههههه..تووووحف

خلاص ارتحت....يعنى حتى فى البلوج ماعرفتش انا وانت نقعد برواقه ومن غير مايطبوا على نفسنا زى مابيعملوا فى الحقيقه ..هههههههههه...تقوم تقولى كده قى وشى حمصيه وسمسميه...استلم ..اهى حمصيه حتقولك : بقى كدااااا ..انتو قاعدين هنا لوحدكم وسايبنا؟؟ خدونا معاكم..هههههههههه...استريحت ياعمنا؟؟

كل سنه وانتى طيبه يا حلاوتى

زى النهارده من كام سنه فاتت دخلنا بيتنا انا وحلاوة

وبدأنا رحلتنا لوحدنا مفيش معانا غير ربنا سبحانه وتعالى 

وامنيات طيبه وحب كبير 

والنهارده ...وبعد السنين دى كلها اكتشفت ان اللى بينى وبين حلاوه مش حب وبس

اللى بينا بقى تاريخ بكل اللى فيه من الحب والعشرة والكفاح والذكريات والخبره والالم والامل 

واللى خلانا النهارده انا وحلاوه بنفهم بعض من غير منتكلم وبنحلم نفس الحلم 

كل سنه وانتى طيبه يا حلاوتى 

وعقبال مليون سنه سعاده  وهنا 

وربنا يخليكى ليا تنورى حياتى وتسعدى ايامى

ويحفظ لنا ويبارك لنا فى بناتنا (حمصيه) و(سمسميه)

ويجعل كلامنا خفيف عليهم... 

اقولك ايه عن الشوق ياحبيبى

شويه انى اقولك ياحبيبى....ياريت فيه كلمه اكتر من حبيبى

حمص

دى اجمل كلمه فى الدنيا حبيبى...بقولهالك وبرضو مش كفايه

النهارده عيد جوازنا...كان 1 ديسمبر عيد كتب كتابنا...مافيش تاريخ بينا ممكن انساه..

ومهما قلتلك ف القلب اكتر

.مافيش كلام لسه يقدر يحكى لك عن كل اللى جوايا لك..اى كلام حيكون قليل عليك...الكلام مايقدرش يعبر ..كل سنه وانت طيب ياحبيبى..عمرى مانسيت لحظه بينا...فاكر يوم جوازنا..؟ وقد ايه حاربنا الكل ووقفنا قدام كل ظروفنا ومااحتجناش حد وابتدينا على قدنا بفرح صحيح كان على الضيق اوى وصغير اوى لكن عندنا كان اجمل فرح...ويومها رفضنا نقلع دبلة الخطوبه من صباعنا اليمين علشان ننقلها للشمال فكان اختراعنا المتواضع التلقائى باننا لزقنا صوابعنا اليمين بالراس بصوابعنا الشمال فنقلنا الدبل من غير ماتخرج من ايدينا علشان اقسمنا مانقلعها ابدا.. كل قرايبنا بعد كده عملوا زينا ...يومها روحنا وانت سايق عربيتك وانا جمبك وماكنش معانا استبن وكنا خايفين فردة الكاوتش تنام مننا لكن ربنا سترها يومها زى ماكان دايما ساترها معانا فى كل حياتنا واكرمنا وانعم علينا بكل النعم...

كنا دايما سبب حسد وغيره من اللى حوالينا لغاية مافهموا الحقيقه...

الحقيقه اننا.... ظاهره غير قابله للتكرار...

ربنا يديم اللى بينا....ويخليك ليا...فى كل مره عملنا فيها عمره مع بعض كانت اول دعوه بمجرد ماجبهتى تلمس ارض الحرم ان ربنا مايخلنيش ابدا اعيش من غيرك وان تكون نهاية حياتى قبلك ..يارب تقبل منى دعائى

حمص...عارف انا كام مره راسى نامت فى مكان غير جمب راسك؟

انا عداهم .. 11 مره فى خلال حياتنا مع بعض....وكانو بسبب ان بيت اهلى فى بلد غير اللى انا وانت ساكنين فيها فكنت بضطر ابيت وانا قلبى حزين ومكسور ومابنامش ولاعينى بتغفل واول ما يجى الفجر اقوم اجرى البس علشان الحق اتوبيس اول ميعاد ...غصب عنى مش بايدى....

ياريت فيه كلمه اوصف بيها حبى...وانا فى قلبى كلام مالوش نهايه

ربنا يخليك ليا وعقبال مليون سنه بينا..واحنا بخير وسعاده مع اللى مالين علينا حياتنا كلها....ربنا يخليك ويخليهم يارب

http://www.6rbtop.com/listen.php?song_id=1855&type=au&q=hi

بين الحلبى..... والزيدى

لم يكن سليمان الحلبي مجرد مغامر سعى إلى كتابة أسمه في سجل الأبطال حينما تربص بالجنرال الفرنسي كليبر وقتله في القاهرة، ولكنه كان مجاهدا كبيرا برغم سنوات عمره الاربعه والعشرون

فقد كان طالب العلم الازهرى الشاب يعلم انه مقتول...مقتول...مقتول 

ولكن اصحاب الرسالات لاتهمهم تبعات اعمالهم ومصائرهم بقدر مايهمهم نتائج تلك الرساله

تذكرت سليمان الحلبى فور رؤيتى لحادث القاء الحذاء فى وجه بوش من قِبل صحفى عراقى سبق للجنود الامريكان قتل اخوته وتمنيت لو كان الحذاء محشواً بقنابل عنقوديه امريكيه الصنع كتلك التى اصابت اطفال لبنان وفلسطين حتى يذوق يوش من نفس الاناء الذى سقانا منه

وياريت منتظر الزيدى كان ركب لحذائه نصف نعل من القنابل البلاستيكيه تنفجر فى وجه بوش فلا تقتله ولكن تصيبه بالعديد من العاهات ربما يجعله هذا يندم على مافعله برجال ونساء واطفال المسلمين فى افغانستان والعراق ولبنان وفلسطين

وافقت على صوت صرخات الصحفى وهو يرقد تحت اقدام ضاربيه من العراقيين وهو يئن من الصفعات والركلات وعلمت ساعتها انه اجاد اختيار هدفه فمن المؤكد انه يعلم تماما انه لو كان هذا الحذاء موجههاً لاحد الحكام العراقيين العملاء عبيد الامريكان لما اكتفى الحضور بالضرب والركل ولكان مصيه فى قاع احد الابار او ملايين القبور التى تحتوى على رفات المجاهدين .....اما وقد فعلها فى حضرة  الامبراطوربوش....فهو فى امان ولن يجروء احد على قتله ولا رميه وراء الشمس...ولا نامت اعين الجبناء.....

اما رد فعل بوش على الحادث فلا اجد له رداً ابلغ من قول الشاعر

قومٌ إذا ضربَ النعالُ وجوههم ...

صرخ النعال بأيّ ذنبٍ أَضربُ !!

المحروس نن عين ابوه......الجنيه...

لم يصدمنى الخبر الذى واجهنى فى صدر صحيفة الصباح

 والذى يبشر بتخفيض سعر المحروس نن عين ابوه (الجنيه المصرى)

اذ ان الجنيه المصرى يتعرض لهزات متتاليه فى الاونه الاخيرة 

انعكست آثارها السلبيه على حياة كل مصرى 

وللاسف فإن هذا الجنيه المترنح وسط العملات الاخرى 

يعانى معاناة الشعب المصرى المطحون تحت وطأه الفساد وسرقة موارده وثرواته

وبيع ممتلكاته للاجانب وتهريب امواله للخارج 

يعنى من الاخر الجنيه يعكس صورة حقيقيه لمعاناه المصرى اليوم

ولكن هل تعلم ان الجنيه المصرى كان يوماً ما ((عمله محترمه))

ارجوك لاتنظر الىّ هذه النظره

فهى توحى بأنك تشك فى مصداقية كلامى

ولكنى اؤكد لك ان الجنيه كان يوماً عملة قوية وسط العملات العالميه

فبعد الحرب العالميه الاولى كا ن الجنيه الاسترلينى (الذهب)

يساوى 95 قرش مصرى

ملحوظه: الجنيه الاسترلينى (الورق) يساوى 9 جنيهات مصريه فى 2008

ومن منا لايذكر فيلم (المليونير الفقير) لاسماعيل يس

حيث أطلق عليه اصدقائه لقب (مستر دولار)

حيث كان راتبه اليومى عشرون قرشاً مصرياً 

وهو ماكان يساوى دولار امريكى (بحاله) فى هذا الزمن (الجميل)

واليوم هاهو الدولار يواصل قفزاته من جديد فق رأس الجنيه المصرى 

الذى لايتوقف عن الانحناء 

حتى كادت جبهته تلامس الارض

حبيت النهارده اعرض لكم ارشيف لصور الجنيه المصرى من سنه 1899 وحتى 2008

وكمان جدول يوضح سعر صرف الدولار بالنسبه للجنيه المصرى فى نفس الفتره 

ومن عصر حكم الخديو توفيق وحتى عصر الخديو مبارك 

(1899)

(1914)

(1924)

(1926)

(1930)

(1950)

(1952)

(1967)

(1978)

(2008)

(الباشــــــا الدولار)

((الثمن بالدولار الأمريكى --- الفترة --- الحكام)) 

0.20 , 1885 - 1939 , الخديو توفيق - الخديو عباس حلمى الثانى 

- السلطان حسين

 - الملك فؤاد الأول و الملك فاروق الأول

0.25 , 1940 - 1949 , الملك فاروق

0.36 , 1950 - 1967 , الملك فاروق - الملك فؤاد الثانى

 - الرئيس محمد نجيب و الرئيس جمال عبد الناصر 

0.40 , 1968 - 1978 , الرئيس جمال عبد الناصر و الرئيس أنور السادات 

0.60 , 1979 - 1988 , الرئيس أنور السادات و الرئيس حسنى مبارك

0.83 , 1989 , الرئيس حسنى مبارك

1.50 , 1990 , الرئيس حسنى مبارك

3.00 , 1991 , الرئيس حسنى مبارك

3.33 , 1992 , الرئيس حسنى مبارك

3.39 , 1993 - 1998 , الرئيس حنسى مبارك

3.40 , 1999 , الرئيس حسنى مبارك

3.42 - 3.75 , 2000 , الرئيس حسنى مبارك

3.75 - 4.50 , 2001 , الرئيس حسنى مبارك

4.50 - 4.62 , 2002 , الرئيس حسنى مبارك

4.82 - 613 , 2003 , الرئيس حسنى مبارك

613 - 628 , 2004 , الرئيس حسنى مبارك

5.75 , 2005 - 2007 , الرئيس حسنى مبارك

وكالمعتاد ..وزى كل سنه بنكتشف نفس الاكتشاف...اننا مانعرفش حد ومش عارفين نوزع اللجمه بتاعة الاضحيه ...

كل سنه نفس المأساه...رغم اننا بنفضل نكتب الاسماء بتاعة الناس اللى نعرفهم..ورغم ده بنواجه بصعوبه غريبه فى الوصول لاى حد

المره دى قررنا نحط اكياس اللحمه فى شنطة العربيه بس ناخد كميه بكميه...نخلصها ونروح نجيب تانى من البيت

وابتدينا نوزع على اللى بنقابله فى الشارع بناء على نظرتنا الثاقبه هههههههه وحكمنا على اللى بندى له ومعانا ورقه وقلم علشان نكتب الناس اللى بنديلهم منعا للبس او اللخبطه

وطبعا نظرا لانه من الصعب والمستحيل اننا نسال اى حد على اسمه واحنا بنديله كيس لحمه علشان نسجل اسمه فى الورقه فكان من الضرورى الاستعانه بالفكاكه والالمعيه والحس البوليسى بتاعنا...

حلاوه ادى الراجل اللى جاى علينا ده كيس لحمه

طب اكتبه باسم مين؟

اكتبى الراجل اللى معاه عصايه

وبعدها

حلاوه كيس للراجل اللى جاى علينا

طب اكتب جمبه اسم ايه

اكتبى الراجل اللى ضحك لما اخد الكيس

طب ماكلهم ضحكوا يااخى

لالا ابتسموا بس

وفى الاخر اكتشفت ان معايا ورقه مكتوب فيها مسخره

الست ام ايشارب اخضر

...الراجل اللى بيعرج..

..الراجل اللى حمص قال انه بيشابه عليه وشكله يعرفه.

...البنت المكلبظه...

.الست اللى كان فيه كلب معدى جمبها وهى بتاخد كيس اللحمه.

..الراجل اللى قال عايز فلوس كمان.

...الولد المتعور فى وشه

..ههههههههههههه دى كلها كانت الحاجات المكتوبه فى الورقه اللى معايا

حمص

نعم

حاسه اننا بندى ناس اكتر من مره

لا انا مركز

وربنا انا بشبهه على ناس بيتكرروا

مش معايا....ده مع اللى زيك ياماما

وفى اخر كيس بنديه لواحد راجل لقيناه بيقولنا: والله ياجماعه كتير....ده سادس كيس تدهولى

ههههههههههههههههههههههههههه...فعلا مركز ياحمص باشا....

الحمد لله عدى اول يوم العيد على خير بعد اللقاءات العائليه اللى فعلا فعلا الواحد بعدها بيكتشف انه عنده حق فى الابتعاد عن الاقارب مسافه معينه لاتسمح باى غلطات او مشاحنات او خلافات ..والحمد لله ان اول يوم.....فات

اكتشفت النهارده ياحمص ياحبيبى او اقصد اعدت اكتشاف نظرية شيل ده من ده يرتاح ده عن ده...الحقيقه الاقارب روعه بس لما نكون بنتفرج عليهم فى صوره فى البوم لكن الاحتكاك لابد له من قانون يحكمه وهو قانون طنش تعيش وفوت وكبر وانت العاقل وترارارامرامرام..ياللا..المهم عيد سعيد واللى يطق منا....يموت..براحته بقى هو احنا حنمسك فيه...اهم حاجه نعيد ترتيب الناس فى حياتنا

ثانيا بقى بمناسبة العيد

كل سنه وانت ...زى ماانت....دى احلى دعوه ادعيهالك وربنا

تبقى زى ماانت ...طيب ...وكريم...وكبير اوى فى عين الدنيا كلها....وحنين....ومحب لبيتك واسرتك....كل سنه وانت طيب ياحبيبى

يارب السنه الجايه مع بعض فى الحج ..وربنا مايفرق بينا ابدا..ونكون دايما صحبه هناك

من الغريب جدا موقف انت اكيد فاكره فى الحج لما توهنا عن بعض فى يوم الترويه واحنا رايحين منى وطبعا الدنيا زحمه جدا ومانعرفش رايحين فين ولسه رايحين نركب العربيه اللى حتوصلنا والدنيا زحمه موت ومش معايا اى اثبات شخصيه ولافلوس ..المهم لما اكتشفت اننا توهنا من بعض لقيتنى دموعى سالت وفى لحظه حسيت انى ضعت وان الحج ضاع وانى مش حاشوفك بعد كده وانك حترجع مصر لوحدك وابتديت اعيط وانا بتخيلك راجع مصر من غيرى وازاى حتعيش لوحدك وازاى لما يروح عليا ويبدأ الناس تزن عليك تتجوز واحده تانيه ..ابتديت اغمض عينى بهرب من فكرة جوازك من واحده غيرى وابتدى شيطانى يصورلى انك حتكون مبسوط ومن فتره للتانيه علشان العشره طبعا حتفتكرنى وتترحم عليا بس هى شهور وحتنسانى وابتديت اسمع صوت ضحكتك مع العقربه اللى حتتجوزها وازاى انها حتشيل كل صورى وحتبقى غيرانه منك لما تقولها حلاوه ماكنتش بتعمل كده حلاوه كانت بتعمل كده ..دموعى سالت اكتر واكتر لما افتكرت انها حتبدأ تتريق عليا قصادك

..حتفضحنى .وهى بتفرج كل الناس وتقطع فروتى....اصل ياحمص ياحبيبى

قبل ماسافر سبت دولاب المطبخ مكركب والدولاب بتاع اوضتنا مالحقتش ارتبه ...وفيه مذكرات فى درج المكتب كنت بقول رايى بصراحه فى جوز بنت عمة خالك..والنبى ماتخليه يقراها..ههههههههه

اولا سلامة نافوخك ياحمص ان شالله يارب هو....هو مين؟ هههههههههههههههههههههههههههههههههه

ماانت عارف ..

وهو يعنى الدنيا خربت لما بقالك سنه بتحاول ترخص العربيه ومش عارفه....وايه يعنى

هو يعنى الدنيا اتطربقت لما بقالك سنه بتاخد تصريح مؤقت 3 شهور ب3 شهور..ايه يعنى اكيد هما حاسين انك ماتنفعش تاخد سنه على بعضها..حاسين ان ايدك سايبه وممكن تخلص السنه فى شهر...وايه يعنى ..ماهما ادرى

وهو يعنى الدنيا طارت ..لما ياجلك الترخيص يوم ورا يوم حبيبى ماجالى يوم حبيبى وايه يعنى

وهى يعنى الدنيا باظت لما روحنا المرور 5 مرات بنقعد من الساعه 8 الصبح لغاية 5 مساء ..وايه يعنى بيساعدوا على متانة الروابط العائليه مش كان زمانك فى الشغل وانا فى البيت ..بيقربوا بينا ياحبيبى

هى يعنى الدنيا طارت لما قالولك لازم تدفع سنه ترخيص بس وانت صممت على 3 سنين وفى الاخر قائد المرور صمم على 3 سنين بنفس الحماس اللى انت كنت قررت تاخد فيه سنه واحده بس لما اكتشفنا المبلغ الماهول اللى مطلوب مننا واللى يعدى الال14 الف جنيه..وفى الاخر قالنا تعالوا بعد العيد

هى الدنيا جرى لها ايه لما الرخصه خلصت ومش عارفين نتحرك بالعربيه وكمان البيه القائه نبه عليك ماتمشيش بيها لان ده خطر عليك وممكن تتمسك

وايه يعنى ياحمص ياحبيبى....ماتكبرش الموضوع بقى مش يمكن البيه القائد من اهل الخطوه ومكشوف عن اهله الحجاب وعرف اننا حيحصل لنا موقف وحش بالعربيه فصمم يحمينا من شر المستخبى

ماتعيطش بقى ياحمص....انا... دموع.؟؟؟ ابدا ..دى من الفرحه ياحبيبى

الحج......عرفه

كل سنه وانتوا طيبين 

ويعيد عليكوا الايام المباركه دى بخير وصحه وسعاده وهنا 

وان شاء الله السنه الجايه زى النهارده تكونوا صحبه معايا انا وحلاوة على عرفات

من فضل الله علىّ انه يسر لى نعمه اداء فريضه الحج من فترة طويله "حوالى 15 سنه" 

ومن يوم ما شفت الكعبه بعينى لاول مره وانا حاسس ان قلبى وروحى وعقلى متعلقين بالبيت 

وباجتهد انى اداوم على العمرة والزيارة بقدر استطاعتى حتى بلغ عدد مرات العمرة 8 مرات آخرهم كان رمضان الماضى

وربنا كتب لىّ اداء الفريضه مره تانيه من 7 سنوات اديت فيها فريضه الحج عن والدى رحمة الله عليه اللى توفاه الله وهو مشتاق لاداء فريضه الحج وكان معايا فى رحلة الحج الاخيره زوجتى حلاوة اللى رافقتنى فى كل رحلات العمرة والزيارة اللى طلعتهم

فى المرتين اللى حجيت فيهم كان يوم عرفه بيترك عندى ذكرى لاتزول لانى كنت باحس فى اليوم ده انى اقرب ما اكون للمولى عز وجل وانى زى متجردت من ملابس الدنيا انى برضه اتجردت من كل شهوات وملذات الدنيا واصبح الرابط اللى بيربطنى برب العالمين اقرب واقوى ما يكون

يوم جميل لا يُنسى بتفتكر فيه كل ذنوبك وتعتذر عنها وتطلب التوبه والصفح والمغفره من الرحمن الرحيم وتفتكر برضه كل احبائك الاحياء منهم والاموات فى داعائك وتطلب لهم الرحمه والمغفره والهدايه 

اللهم لاتحرمنا من زياره بيتك حجاجاً او معتمرين

وتقبل منا نسكنا

وتب علينا انك انت التواب الرحيم

لا الله الا الله وحده لاشريك له..له الملك وله الحمد يحيي ويميت وهو على كل شىء قدير 

وآخر دعوانا أن الحمد لله رب العالمين

آآآآآ يا ناااافوخى

على اساس ان كل اللى بيركبوا عربيات كفار ولازم يروحوا النار 

وعلى اساس ان اى واحد مش ماشى على رجليه او مبيركبش ميكروباس او اتوبيس او تاكسى يبقى مارق وزنديق وابن ستين فى سبعين قررت حكومتنا الرشيده تعذيب كل ملاك السيارات لغاية مايتوبوا ويرموا عربياتهم فى البحر ويبقوا زى باقى الناس

انا مش هتكلم عن قانون المرور الجديد اللى مكانش له اى لزو م من اصله واللى اتحول بقدرة قادر لقانون الحزام والموبايل وفى نفس الوقت بقى سيف مسلط على رقاب العباد من اى ضابط مرور معقد او ناقص يطلع بيه عقده على عباد الله اللى مش ناقصين  رخامته

ولا هتكلم عن المطبات اللى ماليه الشوارع واللى تقدر تدمر اجدعها عربيه فى يومين 

ولا عن اشارات المرور اللى مبتشتغلش

ولا عسكرى المرور اللى تحول بفعل الظروف الاقتصاديه الى مساعد لاى منادى سيارات يساعدك فى ركن سيارتك فى الممنوع وبعد كده يقرب منك فى استكانه وهو يحييك بيده وكأنك ضابط عظيم وهو مادد ايده لك بكلمة السر المصريه الشهيره التى اصبحت تستخدم للتسول ((كل سنة وانت طيب يا باشا))

ولا هتكلم عن معدلات الحوادث اللى ارتفعت بشكل جنونى حتى اصبح عدد الوفيات من حوادث السير ينافس عدد الوفيات فى طوابير العيش والقتلى فى اقسام الشرطه على ايد الساده الضباط

ولا عن سعر البنزين وزيت السيارات اللى ارتفع بشكل اصبح يعجز الكثير من راكبى السيارات عن تموين سياراتهم او تغيير الزيت لها فضلا عن صيانتها

انا هتكلم عن حاجه تانيه خالص وهى رسم التنميه الجديد اللى تم فرضه على السيارات بشكل تعسفى وغير مدروس حلقه جديده فى سلسله خنق الشعب المصرى والاستيلاء على موارده الماديه 

الحكومه كعادتها مكفهاش ارتفاع الاسعار الجنونى اللى بيعانى منه الشعب بكل طبقاته ولا سوء المعامله من الشرطه للجمهور فقررت تعاقب كل راكبى السيارات على اساس انهم زى مقلت فى الاول كفار ويستحقوا يدخلوا النار

وعلشان اجراءات فرض ضريبه جديده على السيارات او رفع الضريبه الحاليه يستلزم العرض على مجلس الشعب وعمل مسرحيه زهقنا منها يتناقش فيها القانون ويترفض من اعضاء الاخوان والمعارضه وفى الاخر ....موافقه؟؟؟......مواااااااااااااااااافقه...!!!!!

اختصارا لكل هذا استغلت الحكومه وجود قانون يعطى الحق لوزير الماليه فرض رسم يسمى رسم التنميه على اى سلع يختارها جنابه وبمجرد اعتماد رئيس الوزراء للقرار الوزارى يصبح سارى المفعول على كل الشعب المفعول به ...ولا حول ولا قوة الا بالله 

وصدر فعلا المرسوم الوزارى بفرض رسم تنميه على كل السيارات بقيم تتناسب مع السعه اللتريه للسيارات ابتداء من 500 سى سى وحتى 2000 سى سى وحظيت الفئه الاخيره اللى هى لغاية 2000 سى سى برسم تنميه قدره 1000 جنيه سنوياً

اما السيارات ذات السعه اللتريه اكثر من 2000 سى سى فاكتشفت الحكومه ان اصحابها مش كفار وانما منافقين والعياذ بالله وعشان كده كانت عقوبتهم اكبر وكان رسم التنميه المفروض على السياره 2% من ثمن السياره سنوياً ....آآآه والله ..مش بقولكم منافقين ويستاهلوا الحرق فى نار جهنم .....

ولللحديث بقيه ....اذا كان فى العمر بقيه 

استقيلوا يرحمكم الله

الصراحه انا مش شايف اى مخرج للتصرف المخزى اللى عمله شيخ الازهر الا انه يستقيل ويحافظ على 

بقيه باقيه من كرامه واحترام قد يكنها له بعض المسلمون 

وللاسف ان تصرف شيخ الازهر مصيبه وتبرير هذا التصرف مصيبه اكبر اما ما نشرته الصحف 

الاسرائيليه بالامس فهو الطامه الكبرى 

فإذا كان شيخ الازهر لايعلم ان مصافحة السفاح الذى تلوثت يديه بدماء مئات الالوف من المسلمين شىء 

مخزٍ وعار على من يقوم به فهو لايستحق ان يحمل لقب الامام الاكبر للمسلمين

اما تبرير مكتب شيخ الازهر للاعلام هذا التصرف بعدم معرفة فضيلة الشيخ لشيمون بيريز وان 

المصافحه كانت عابره وتلقائيه فهذه المصيبة الاعظم لان الاسلام يفرض عليك يا شيخ المسلمين الاكبر ان 

تعرف من هم اعدائك واعداء دينك حتى لايغتالوك فى غفلة منك "طبعاً هذا اذا كنت تعتبر من صافحته فى 

حميميه بكلتا يديك مبتسماً انه مازال عدواً لك"....وتلك المصيبه الاعظم فى نظر غالبيه المسلمين خاصة 

فى ظروف حصار غزة الذى تحاول فيه اسرائيل اباده مليون ونصف مسلم يحاج من شيخ الازهر الى 

تصرف شجاع جرىء -ربما لم نعهد له شبيهاً من فضيلته- وأقل هذه التصرفات يكمن فى استقالة فضيلته 

اما الطامه الكبرى وهى التصريحات الرسمية الاسرائيليه التى تقول ان شيخ الازهر هو الذى سعى 

لمصافحة بيريز وانه تبادل معه حديثاً ودياً وانه لاصحة لما صدر من تصريحات من مكتب فضيلته عن تلقائيه اللقاء...

الكارثه الاكبر ان المتحدث باسم فضيلته ختم تبريره التلقائى بإن اعتذار فضيلة الامام الاكبر لعموم المسلمين عن تصرفه غير وارد نهائياً ....

ويا بخت اخوانا النصارى بالبابا بتاعهم اللى منع زيارة بيت المقدس للنصارى طالما القدس محتله بل ويعاقب من خالف تعليماته وزار القدس بالشطب من الكنيسه...

مش بقولك يا فضيلة الشيخ استقيل ...يرحمك الله ....

حمص النهارده قرر انه يسعدنى ونفطر عند عم أسعد...عم اسعد ده صاحب الكافيتريا اللى بنشرب فيها القهوه الصباحيه بتاعتنا ..المهم كل مره الصبح اقوله ياحمص والنبى نجيب فطار زى مالناس بتعمل ونفطر عند اسعد ونشرب بقى شاى ونعيش.

.يقولى لو فطرت مش حاعرف اتغدى.

.ياعم الحج احنا قين والغدا فين...طب مش مهم الغدا نفطر وبعدين نبقى نشوف موضوع الغدا..ياسيدى بلاش نتغدا..نفطر دلوقتى وخلى الغدا بظروفها...

ابدا...مافيش فايده ..المهم قرر النهارده فى لحظة تجلى اننا نفطر..

حلاوه
عيون حلاوه
هاتى لنا طعميه وعيش سخن
وربنا؟
بس طعميه بس..علشان نلحق نتغدا
يخرب بيت الغدا (فى سرى طبعا )
ماتجبيش عيش كتير
طبعا طبعا علشان نقدر نتغدى
اه يادوب رغيفين
وبعد مانزلت من العربيه نده عليا: حلاوه خليهم 5 ترغفه
حاضر ياسى السيد ...حووومووص
رجعت بالعيش
حناكل طعميه بس ..هاتى لنا كمان جبنه بس ماتكتريش علشان طبعا ..أأأأ.
طبعا طبعا مفهوم علشان نقدر نتغدا
تمام
ورجعت بالجبنه
ايه ده جبنه بيضا بس
اومال؟؟
لا كمان جبنه رومى وريكفور وخلى بالك
فاهمه تعليمات سعادتك ...قليل علشان نقدر نتغدى
ورجعت بالجبنه الرومى ولكن وقع نظرى على الراجل المحترم بتاع مطعم الفول والطعميه وبحسى البوليسى الصحى الموسوس لقيته بيطلع بدنجان لسه سخن يجنن
حمص بدنجان بدنجان
ماشى بس هاتى كميه قليله
طبعا طبعا ...علشان نقدر نتغدى
وبعد ماركبت فرمل حمص فرمله جامده
خير عايزين نروح نفطر بقى
استنى ياحلاوه..شايفه عند بتاع الفول والطعميه شيبسى يجنن لسه طالع من النار زى تعليمات جنابك وقوانين الحجر الصحى بتاعك مابتقول
اعمل ايه يعنى الحق عليا بخاف من التلوث؟
طب ياللا بسرعه هاتى منه بس قليل زى ماانتى فاهمه
اه طبعا علشان نقدر نتغداااااااااااااااااااااااااااااااااا
والحكايه كملت بكام ساندوتش حواوشى طبعا قليل علشان نلحق نتغدى...وبزيتون ومخلل ولانشون ومربى وقشطه وعصير .. وده كله لييييييييه؟؟.
.علشان زى ماانتم عارفين ...علشان .نقدر ....نتغداااااااااااااااااااااااااااااااا