حاجه تفرس وتغيظ وبصراحه مالهاش اى معنى غير اننا ناس ماشيين بنريل
ومنعرفش الفرق بين اللازانيا والاندومى...
لما تطلع علينا كل الصحف امبارح باخبار التحقيقات فى قضية قتل بنت المطربه ليلى غفران وصديقتها (الله يرحمهم ويعفو عنا وعنهم)
تقرا فى التحقيقات اقوال المطربه ليلى غفران وهى بتعترف ان بنتها كانت مدمنة مخدرات من 4 سنوات
وانها زهقت من علاجها وانها كانت متجوزه فى السر
بس خلوا بالكم بنتى كانت تعرف ربنا ومتدينه حتى بالاماره
دى عملت عمره فى رمضان اللى فات مع صاحبها ...اقصد خطيبها...يوووووه جوزها...جوزها..
نيجى بقى لاقوال والد القتيله التانيه اللى هى صاحبة الفيلا واللى من واقع محضر مسرح الجريمه
واللى اتنشر فى كل الجرايد كان عباره عن كباريه مصغر
فيه بقايا زجاجات الخمر واثار تعاطى المخدرات...
فيقول والد القتيله بنتى كانت تعرف ربنا كويس اوى ومتدينه جدا
وكانت معايا فى عمرة رمضان اللى فات
ولولا انى كنت متأكد من كده وواثق منها
مكنتش سبتها تسكن لوحدها فى مصر وانا فى السعوديه (لا والله يا رااااجل)
ويستكمل ...بنتى مكانتش بتدخن ولا بتتعاطى مخدرات ولا بتشرب خمره والعياذ بالله
وكل اللى اتذكر فى محضر معاينة مكان الجريمه كدب فى كدب...
اما اقوال والد زميلتهم اللى انصرفت قبل وقوع الجريمه
فأكد فى اقواله ان زوجته حضرت له لتخبره بالحادثه اثناء تواجده فى احد المساجد لصلاة الفجر
وان بنته زى الفل وتعرف ربنا وبتصلى كل الفروض ,وعملت عمره فى رمضان اللى فات
وما بتتأخرش بره البيت بعد الساعه حداشر بالليل
وان علاقتها بالقتيلتين مجرد علاقة زماله
وانها راحت لهم قبل الجريمه علشان تجيب منها كشكول المحاضرات...
ده طبعا غير الجيران اللى فوق شقة القتيله
اللى برضه كانوا ساعه وقوع الجريمه بيصلوا الفجر ...
بس الصراحه معرفش راحوا عمرة رمضان اللى فات ولا لأ.......
المشاركات
ليست هناك تعليقات:
إرسال تعليق